Heemkunde voor de basisscholen in Oost- en Weststellingwerf

Categorie: Media (Pagina 2 van 2)

Netuurexkursies

Netuurexkursie in Buil en Hooltpae

Ok dit jaor orgeniseert de Stellingwarver Schrieversronte weer netuurexkursies t.b.v. et vak Hiemkunde in et basisonderwies. Kotleden gong Freddie de Vries mit kiender van Hooltpae et veld in, mar ok leerlingen van basisschoele De Oostenbrink van Buil gongen op exkursie. Daorveur gongen ze op ’e fiets de kaante van Doldersun uut en kuierden daor in de bossen o.l.v. exkursieleider Andries van der Veen van Wolvege.
Van der Veen is riegelmaotig as exkursieleider de netuur in, zo verzorgt hi’j ok exkursies veur Staotsbosbeheer. Exkursies mit kiender vint Van der Veen arg mooi om te doen. ‘Kiender hebben veul belangstelling veur de netuur en staon daor nog hielemaole eupen veur. Mit et verzorgen van disse exkursies hoop ik de kiender nog meer liefde, mar ok respekt, bi’j te brengen veur de prachtige netuur om oons henne. We wonen in een schitterend gebied, en in elk dörp is wel wat moois en biezunders zien te laoten en om over te vertellen,’ neffens Van der Veen.

Netuurexkursie in Ni’jhooltpae

Kotleden weren de ooldste kiender van basisschoele ’t Holtpad van Ni’jhooltpae op schoelereisien naor Appelsche. Tiedens die mooie daegen wodde d’r ok een Stellingwarver netuurexkursie holen in et kader van et vak Hiemkunde in et basisonderwies. Appelsche is vanzels een plak bi’j uutstek veur zoks! En mit enthousiaste exkursieleiders as Harm Smid en Andries van der Veen (beide van Wolvege) kan et niet aanders as et wodt een prachtig gebeuren! Ommedaenken was d’r veur de omgeving, veur wat aj’ in et Appelschester gebied allemaole zien kunnen, en vanzels veural veur wat d’r tiedens de exkursie op je pad komt. De kiender van Ni’jhooltpae hebben geweldig geneuten van alle verhaelen die verteld wodden, mar ok de beide exkursieleiders kieken mit veul plezier weeromme op disse mooi exkursie.

Netuurexkursie in Else

Woensdagmorgen 15 juni trok netuurexkursieleider Andries van der Veen van Wolvege d’r op uut mit een groep kiender van de schoele van Else. Dat gebeurde opni’j in et kader van et projekt Netuurexkursies t.b.v. et vak Hiemkunde in et basisonderwies. De orgenisaosie daorvan is in hanen van een speciaole warkgroep van de Stellingwarver Schrieversronte, waor Van der Veen ok diel van uutmaekt. (foto’s Netuurexkursie in Else van Lenus v.d. Broek)

Netuur in et Stellingwarfs op schoeleTV – Ruurd Jelle van der Leij

Voegelkenner en fotograaf Ruurd Jelle van der Leij was te zien in et pergramme Tsjek van de Friese schoeletillevisie.
De vroegere inwoner van Hooltpae en fotograaf van Et Stellingwarver voegelboek verzorgde drie keer et netuuronderdiel ‘Netuurlik’ van dat pergramme veur de basisschoelen.
Van der Leij prissenteert zien onderwarpen in et Stellingwarfs.
De onderwarpen die an bod kommen bin de iesvoegel, de wolf en de adder.
An dat dadde onderdiel warkt ok de Stellingwarver netuurkenner Andries van der Veen uut Wolvege mit.
De opnaemen bin o.e. maekt in et Drents-Friese woold bi’j Appelsche.

Et eerste pergramme ku’j hier bekieken: http://www.omropfryslan.nl/utstjoering/tsjek-fan-29-april-2015-1030

Nieuwere berichten »

© 2021 Stellingwerf Heemkunde

Thema gemaakt door Anders NorenBoven ↑